العيادة اللي بتدوسها أم الشهيد السوري ما بيدوسها الخونة

العيادة اللي بتدوسها أم الشهيد السوري ما بيدوسها الخونة

ربما تحتوي الصورة على: ‏‏شخص واحد‏، و‏‏يبتسم‏، و‏‏‏وقوف‏ و‏جلوس‏‏‏‏‏

حدثت اليوم معي حادثة أودّ أن أحدثكم عنها :

حوالي الساعة ال 10 صباحاً وبينما أنا أنتقل من مشفى إلى مشفى جاءني اتصال على موبايلي من رقم أرضي ….
ـ آلووو … دوكتورة ريم عرنوق ؟؟!
ـ نعم أنا الدكتورة ريم … تفضلي …
ـ دوكتورة معك السفارة العمانية … أنا سكرتيرة السفير …
ـ أوووف … السفارة العمانية فرد مرة ؟؟؟ أهلا وسهلا … خير ؟؟؟
ـ كل خير إن شالله … زوجة السفير العماني بدها تجي تتعاين عندك , ممكن تعطينا موعد ؟؟؟
ـ تتعاين عندي أنا ؟؟؟ ليش أنا بالذات ؟؟؟
ـ سمعت عنك إنك شاطرة وحابة تنفحص عندك ….
ـ أممم … السفير العماني ؟؟؟
ـ نعم السفير العماني …
ـ مين معلمو للسفير ؟؟؟
ـ عفواً ؟؟!
ـ السفير العماني تابع لأي وزارة ؟؟؟
ـ لوزارة الخارجية طبعاً …
ـ ومين وزير الخارجية العماني ؟؟؟ بتعرفيه ؟؟؟
ـ طبعاً بعرفو دوكتورة , أنا سورية بس بشتغل بالسفارة العمانية من زمان … سيادة الوزير يوسف بن علوي …

ـ مو سيادة الوزير يوسف بن علوي هو بذاته اللي كان عم يصافح رئيس الوزراء الإسرائيلي نتنياهو من 3 أيام بوارسو ؟؟!
ـ أيييييه ؟؟؟
ـ إيه ما بيشرفني أستقبل بعيادتي موظف عند وزير كان عم يتباوس هو ورئيس وزراء عدوي قبل 3 أيام ….
ـ دوكتورة شو عم تحكي ؟؟؟ رح ندفع معاينتك بالدولار …
ـ ههههههههه يا ريتك ما قلتيها لهالكلمة , يا بنتي الدولار وبابوجي سواااا …
ـ هههههههههه أكيد عم تمزحي دوكتورة …
ـ لا ما عم أمزح … ما بيشرفني أستقبل موظف معلمو بيصافح عدوي ….
ـ دوكتورة … ما عمل شي غلط سيادة وزير الخارجية العماني … لازم يكون فيه مين يقرب وجهات النظر …
ـ وجهات النظر بينا وبين إسرائيل ؟؟؟ إسرائيل عدونا للأبد , إسرائيل خربت بيوتنا بهلـ 8 سنين … دمرت بلدنا … موّلت وسلحت وعالجت الإرهابيين اللي قتلوا شبابنا … شو وجهات نظر ما وجهات نظر ؟؟! الشرف والمبادئ ما فيهن وجهات نظر ….
ـ دوكتورة وزير خارجيتنا استقبل ابن علوي …
ـ يصطفل … هو دبلوماسي وشغلتو يستقبل … أنا لأ … أنا طبيبة ومو مطلوب مني أستقبل صديق عدوي …
ـ صح … حضرتك طبيبة ومهنتك إنسانية … إنسانياً لازم تعايني زوجة السفير …
ـ بتعرفي ؟؟؟ هلئ إنتي على وشك تغلبيني … مسكتيني من إيدي اللي بتوجعني : الإنسانية …
ـ معناها رح تعالجيها لزوجة السفير ؟؟؟
ـ طيب … إذا استقبلتها وعالجتها إنسانياً , وشافوها زوجات الشهداء وأمهاتهن اللي بيراجعوني , شو بدي قول إنسانياً لأمهات الشهداء ؟؟؟ هاد وزيره كان عم يصافح اللي قتل ولادكن ؟؟؟ قولي لي إنسانياً شو موقفي أدام أم الشهيد ؟؟؟
زوجة السفير فيها تروح تتعالج عند غيري , بس أنا وين بدي روح من عيون أم الشهيد ؟؟؟؟؟؟
ـ ……….
ـ لذلك يا بنتي قولي للسفير وزوجته : الدكتورة ريم عرنوق بتعتذر منكن وبتقلكن العيادة اللي بتدوسها أم الشهيد السوري ما بتدوسها زوجة السفير اللي وزيره بيصافح الاسرائيلي ………. وهلئ اسمحيلي بدي فوت على غرفة العمليات …
ـ موفقة دوكتورة ….
ـ الله يسلمك … الله معك ……….
……………
هيك صار معي اليوم الصبح يا رفقاتي …..
مسا الخير …….
~~~
د . ريم عرنوق